Pejalai MA? Ujung minggu tu tadi (7/8 Dec) MA nemuai ngagai Rh Empaling, Jungkong Pandak, Bakong S.Aman. Hmmmm, ke sera tu, MA nadai mai budigad. Laban semua bala geng sibuk enggau pengawa caroling, enggau pengawa bukai. Kakpen enda, MA belelubah nguhitka bini no 2 MA ari Kch-Bakong S.Aman-Kch. Ada cerita best!!!! Gua cer....cer.
MA mupuk ari rumah urung pukul 2.40pm ngalihari 7 Dec. Enggai laun, laban jalai tunga kin bisi sekeda nya belubang-lubang. Jai. Jelu kangaroo begedi mih engkekejuk ba dia. Nadai feeling. Ngerusak pala patung bala kangaroo aja.
Sangkai endar ba menua S.Aman urung pukul 5.10pm, MA singgah ba Shell Jalai Sabu. Kemi, bepungas mua, seraya sesais enda lama, ngedarka tulang punggung. Pama utai dederiba kekediri. Tembu nya, MA alu bekejang, laban ke udah besemaya enggau Mikol (anak TR) , deka datai tumu, agi tawas. Ulih ga belelak sebedau pengawa berengkah. Mujur?? ENDA. Hahaha....MA salah biluk nuju simpang kiba. Ku ke Mikol, ari pasar nuju ke rh panjai, enda nyengala jauh. Urung 50 min pejalai. Enti ari simpang Gran Lingga kira ke kurang ari 30 min. Tang MA udah dreba urung 40 min, makin jauh, makin mit jalai. Makin lama, makin sunyi dunya. Fuuhhh. Pun kayu aja ke bisi ngengepai kiba kanan. Anang ke mensia, tupai lungau nadai dipeda ayan ngerayap ngelayang jalai. Ngasaika diri tesat, MA betali-alau nuju Mikol baru, ke alai iya, berunding deka ngambat MA ba pun simpang. Hmmmmm....
Laban kedeka nguji baru, dia MA majakka pejalai, kira bisi 10 min kenya. Udahnya MA tepedaka 2 iku ke benung nginti ba tisi parit. Siku nembiak (pelaba sagam anak ati MA nembiak tu beumur enti enda 11/12 taun). Aku enggau ati ke baruh lalu nyapa seduai. Tudah anak, engka nangika MA samseng ladang (laban maya nya MA belabung pala). Tudah apai iya ke berani nyaut seraya ngampir MA.
'Apuu, salah jalai nn tu. Tu jalai nunga ke Kejatau. Jauh udah nn tu tama kitu. Uji nn pulai ke simpang besai tadi, udah nya biluk kanan.'
Ku aku nyaut,'Bah, enti ari simpang nya, jauh kini simpang nuju ke Jungkong?'
'Enda....pulai baru nn ngagai pun jalai,' ku tudah ngajar aku. Peda2 MA ari paras pendiau iya umur bedau mega udah manggai ngagai angka 50. Peratika MA, seduai betepanka Modenas Jaguh, diparking teguh ba tisi jalai.
'Bah, tau karapka aku mih seduai tu,' ku anak ati betelai dalam din. Irau bebalut enggau tusah ati, laban hari majak petang. Ujan enggai enda nurun ga. Minta puji amat. Maya MA ke dituntung penanggul tu ga iya ujan.
MA alu nyurutka kerita begadai2. Udah nya apai orang nya tadi alu ngepai baru.
'Aku nangika nn majak tesat. Udah ga tu majak petang. Manah nn entudi kamiduai. Lagi nganjung d ngagai pun simpang,' ku iya.
MA antara kasih, pia mega pengirau ati majak malut runding diri. 'Asapai! Enggai enda tesat!' Ku anak ati MA muchau2 dalam din. Seduai pan dipeda besikap, nepu kereban ke bela bisi dibai, ditepu dalam raga. Aku semina nganti injin Jaguh diidupka.
Betunda udi mih kami sebuat udahnya ngelaban ujan. Kada mih anak mensia, ku ke ati aku ga, agi ka nyangkal pemanah budi orang ke udah besedia mantu. Kami udahnya biluk tunga ke kanan, nujah bukit jelan peninggi. Majak ga ati aku irau. Mati MA udah tu!
Nemu nya jalai nya jalai muntang/mintas (short-cut). Selamat. Hmmm, amat besai ga penguji ari Petara laban sepengudahnya, injin Jaguh padam sedu-padam sedu. Kak pen enda, MA nganti seduai menyanak ngerituk begian bateri. Basah, sereta bisi 'shorts' laban ke basah. Aduii.
Maya nya mega MA berundingka mayuh pekara. Enda patut ga MA kempang ninggalka seduai beranak nyurung Jaguh nyentukka rumah. Kepuas berunding, kami 3 begigaka anak tali-ka towing Jaguh! Pengujung iya, tali mak raga, nyadi mangsa penyelamat keadaan. Udah ke ditancang manah ba 'hook' bonet belakang kerita MA, kami pan mupuk. Anak iya dibai MA dalam kerita, taja tudah ka beberat ati, malu.
20km/j, kami pan sangkai ba mua rumah seduai. Udah ke muka simpul mak raga, kami pan betabi, seraya MA ke madahka diri mupuk. Maya nya, kerita laki Joyce Menti baru udah mansa. MA entudi sida iya. Ba Simpang Gran, Mikol udah bendar betempapka nyamuk lama nganti dalam kerita. Kasih tudah. Kami pan udah nya mupuk begadai2 laban ke ujan. Niki ba rumah panjai, urung pukul 7.45lemai. Fuhhhhh, pedis isi! Taja pia, Terima Kasih ngagai Petara laban MA udah likun datai sereta nudukka diri dalam bilik penaik TR Empaling. Ka manjung asai. Tang kasih ke tudah TR enda dapat, udah gegaring ngenatka pemedis pala (mabuk!).
Udah ke berandau berampas enda lama, kami sebuah pan dinah ke urang makai lemai. Tudah pangan, Joyce Menti, Ken (laki iya), Joseph Dresa enggau siku agi kaban Joseph. Tembu makai, kami bela ngintu setin siku, dikena warming-up dulu. Maya nya mega petunggal tudah Tupai (Dj Ijau), datai seraya madahka nama diri. Hahaha. Bela udah bulih pemedis magang. Haiiiisssssh, layannnnn je la.
Pengawa kami berengkah urung pukul 8.50 malam, enggau jaku pengelalu ari Sapit TR. Udah nya, MA pan berengkah nyadi MC rasmi nyentukka ngagai pengujung program. Ka ditusi magang2, ujung2 nyadi novel Entry tu. Hahahaha..
Sama bekunsika sekeda tibang gambar ke sempat dikachit MA ngena HP Sony Miro. Sekeda dikachit bala ke dia mih, nya kebuah gambar udu 'blur'. Enda ngawa, ikas mih gerai, neyaaaaa.
Mikol..anak TR. Kamiduai ke nyaga lagu maya nya. Sabar aja la labu ;)
Sekeda ari raban dancers. Warga tua, semua udah lari ke teluk dinding. Nangi ke indik.
Josesph Dresa in action. Ewaaaahhhhhh. Gbr blur laban jari penat megai kerupun.
Joyce Menti, Joseph, MA & Mikol. Kira ke mujur pengawa & terkawal. Suasana udah bisi kelaie ka enda entu-enda entu, Mikol alu ngasuh closing urung pukul 2 dini hari.
Nudukka diri ba bilik TR. Dinahka pemakai (salau), enggau ai rimau. Nadai cecelap nya u, ukai bisi karan. Kasih ke bala sida ditu (8 pintu) ke udah baum ngidupka injin api nyentukka pagi. Ulih YB ngitung berapa bajet kena meli binjin? Disil? Uji rumah sekeda pemesai ga sama bekenaka injin api ba nengeri, awak ke sama bejimat ngelimat minyak. Kada tan tinduk enda ngena ekon. Perrrgh.
Dani pagi nya, tembu ngirup kupi, MA lipak enda lama ba ruai. Nyenip pemanah rampa menua Jungkong Pandak. Beumai padi magang urang ditu.
Gambar atas/baruh : Sekeda bala peminat ke biak umur mih nya. Gaga ati kena gambar.
Datai ba pasar, MA sempat betemu enggau petunggal MA Cikgu Robia & Ika Desmond. Dibai seduai singgah enda lama nemuai ke rumah ba Seri Jaya. Udah ke tembu ngirup sereta mangkil siti dua kempat ruti, MA pan bekejang. Seduai pan sama ka mulaika diri ke Gerija St Luke ngambi anak tinggal. Terima kasih udah ngirumka dabai/langsat. Chukup lama enda betemu laban ke sama mai diri nitihka periuk asi.
Udah nya alu neruska pejalai nuju menua Mayau. Sangkai ba Serian, seraya ke belelak, kemi & nyelapka injin kerita. 5.05pm, MA sangkai ba rumah kakak ba Kpg Kudei Baru. Mandi, belelak, berandau, makai!
Nya ajalah cerita pejalai MA ujung minggu tu tadi. Amai ku orang tuai. Malu betanya tesat jalai, enti tesat nikal baru ngagai pun jalai. Ba puak menua S.Aman, MA enda tesat, laban ngena Maps! Hahaha, Bisi 'indu urang putih' meri direction, tunga jalai. Sepuluh sin enda mih tesat. Temu jalai. Nya mih cerita pejalai MA Kch-S.Aman-Kch. Malamnya, belelak endar2. Pedis punggung bai dreba solo.
Pengawa lebuh ke nyadi MC pengawa 'taklimat' ke diatur Recording Industry Association of Msia (RIM), ba Hilton Hotel, Kch (20 Nov).
MC maya melah pinang Frankly Robert Galayan (Swak) & indu dara Sabah, Laura Jonly. Ari ruang bilik 'seniman'. Pengantin malamnya bela main liveband ;)
Saja ka shot cover pengantin & programme-flow.
Jarang meda pengantin Iban begagaka panggau endur besanding (pelamin). Kreatif ga pengantin tu. Congrats ngagai Fedem Dilly & Jenny. Pengerami diatur ba Hunco Restaurant, Bt 13.
Borneo Ethnic Cafe (BE)? Ohhh, agi dalam proses 'nego' ngau bala geng ke bisi minat ka take-over, Tang rata2 ka mai MA join sekali, as a share-partner. Haiiiiyuuuuuuu, itu mau kasi pikir 87kali lah. Ukai nama, laban ka dani pagi nya menjadi satu penderitaan! Dahla sekula udah ka dibuka baru. Apapun, MA memang sayauka BE. Siti2 aja palan Iban ba tengah2 dunya Cina. 28 hari da agi sebedau nyambut penatai taun 2014. Ngarapka taun baru, pengidup lebih kow2, gerai nyamai, lantang senang, chelap lindap nguan menua. Kan? Bekaban biar seribu, munsuh anang digiga (tapi hakikat iya, ni lah semua mensia nya manah magang. Bisi sekeda nyadi duri dalam dagin, kaban perut ikan madi perut jani..... Ku ini aku, buk sama celum uchu2, tang ati dalam din, kitai enda ulih neka).
OK lah, ila betemu baru dalam entry MA kedeka datai. Merry Xmas ngagai semua followers MA & Happy New Year dua kusong satu empat ;) Cheerrrrrrsssss!!!
No comments:
Post a Comment